आपस म मत लड़ो - कविता

              

आपस म मत लड़ो

कतिया होंण आपस म मत लड़ो l

समाज का हक म खूब लड़ो l

आपस म लड़नो कमजोरी छे l

कोरी या सीनाजोरी छे l

छोटी छोटी बात म मत लड़ी पड़ो l

कतिया होंण आपस म...........

जोर तुम्हारा म खूब ई भरेल छे l

फिर बी तुम क्यौं खूब ई डरेल छे l

कसो बठेगा तुम्हारो धड़ो l

कतिया होंण आपस म............

पोर्या पारी न ख खूब भँणाओ l

कागत पेन हथियार बँणाओ l

आरु तुम खुद बी खूब ई पढ़ो l

कतिया होंण आपस म.............

नारी रक्षा बड़ो छे जिम्मो l

इनको खुद ही करी लेओ बिमो l

जे का ले ण खम्बा ज सा खड़ो l

कतिया होंण आपस म............

 

नेतागिरी बाह्यर को काम छे l

समाज भित्तर ए प लगाम छे l

नेतागिरी करी करी मत तुम लड़ो l

कतिया होंण आपस म.....,......

रूढ़ी होंण छे बड़ी बिमारी l

टोना टोटका छे महामारी l

ढोंग धतूरा म मत पड़ो l

कतिया होंण आपस म ............

जरूरी छे समाज म एको l 

गुर्रा फुर्री स मत देखो l

करो मत आपस म झगड़ो l

 कतिया होंण आपस म............

दारू दर्पण स दूर ई रहिजो l

सारा नशा न ख बाय बाय कईजो l

नशा म मत नाली म सपड़ो l

कतिया होंण आपस म........,.,.

मदिरा माँस मत हाथ लगाओ l

इनकी कबी राह मत जाओ। 

खाई पी ख खूब ई मत बड़बड़ो l

कतिया होंण आपस म..,.....,....

फूगी फूगी मत रहो रे भैया l आड़ा टेढ़ा मत चलो रे भैया l 

रिसाई ख खूब ई मत अकड़ो l

कतिया होंण आपस म..........,..

जसो ब ण उसो बजन उठाओ l

मण भर,किलो,छटाक उठाओ l

पण मिली जुली संग म बढ़ो l

कतिया होंण आपस म............

चिकणों आँगणों म्हारो समाज छे l 

आँगणों सब घर होंण को ताज छे l

लड़ी भीड़ी ए ख मत करो खुड़बड़ो l

कतिया होंण आपस म.............

                      

             प्रहलाद सिंह चौरे

                    हरदा